Gallaphur tant erra que au troisieme jour il monta une montaigne ou il trouva ung temple … Dist l'ancien home …: – Sire, on aoure ceans la Deesse des Songes. – Par ma foy, dist Gallaphur, c'est une fole deesse. – Ne vous en gabbez pas, dist le varlet, car elle est de grand merite, et ne vous conseille point d'entrer ceans au moins que ne faittes vostre paix a elle. – Sire, dist Gallaphur, oncquez plus ne oÿ parler d'elle et le roy Perce-forest en son tamps ne souffroit aourer que le Dieu Souverain. – Sire, dist le varlet, le roy Perceforest aouroit a sa devotion. Mais après sa mort une dame nommee Sarra … donnoit respons aux pucelles de leurs songes …, tellement qu'aprez sa mort les pucelles l'ont nommé la Deesse des Songes et lui ont fait ce temple ou elles l'aourent, car personne ne veille une nuit en ce temple que … il songera aucune chose du tamps advenir dont sur ce pourveoir se pourra. – Vallet, dist Gallaphur, bien sçay que le roy Perce-forest ama moult ceste dame en son tamps, mais on ne doit pas legierement croire sy haulte aventure comme d'une femme mortelle tenir a deesse, combien que ceste nuit demourray ceans pour sçavoir aucun point de sa vertu. … Sy s'endormy … Lors lui sambla que la deesse Sarra lui vint au devant … puis l'emmena sus une tant haulte montaigne qu'il pouoit bien voir tout le païs de Bretaigne, puis lui dist: – Gallaphur, regarde, retiens et mets en memoire ce que voir pues a l'entour de toy. Atant s'en parti et Gallaphur demoura esbahi des merveilles qu'il veoit par la Grant Bretaigne.