L’autre jour mon chimin aloie; 1r

En alant malencolioie

Pour miex savoir

Ou bien q[ue] uns homs puet avoir,

Ne coment se puet esmouvoir

A si grant fait

Quant a estre en armes parfait.

Certes il couvient que il ait

De Dieu aÿe;

Autrement ne porroit il mie 10

Venir a si grant seignourie

Com d’estre bon.

Hé Diex! com c’est .i. tres biau non!

Et bien conquerir le doit on,

Si com moy semble,

Que de bonté puet l’en entendre

Que l’en doit venir a l’entente

De grant prouesce.

Certes Diex li fait bele grace

A celui qui tel nom pourchace; 1v 20

Par sa bonté

Diex li donne grant heürté Quant a ces .ii. poins est monté.

Mez n’est pas fais;

Car avant qu’il soit touz parfais,

Couvient il que par ses bons fais,

Selonc m’entente,

Qu’il viegne a tres haute vaillance,

Qui est la derreniere science

Quant pour gent d’armes 30

Qu’il pueent avoir en fait d’armes,

Et pour les corps et pour les armes,

Ce m’est avis.

Bien doit a Dieu prier mercies

Cil qui il donne .i. tel pris

Sanz vilennie.

La tres douce Vierge Marie

Doit deprier toute sa vie

Devotement

Qu’elle prie son chier enfant 40

Qu’il li doint vivre tellement

Que il ne face 2 r

Que ce qu’il a fait ne defface,

Et par pechié ne se defface

De telle honnour

Qu’est acquise a si grant doulour

Par la grace de cel seignour

Qui puet tout faire

Et qui nous puet (touz) faire et deffaire.

Si li prions de nostre affaire 50

Par maintenant

Que cestui(t) dit parfaitement

Me doint ensuivir tellement

Qu’il puisse plaire

A ceulz qui voudront a Dieu plaire,

Que ci puissent prendre exemplaire

De a bien venir,

D’onneur a leur vie acquerir,

Et en l’amour Diex defenir

Entierement. 60

Or alons au commencement

De nostre matiere briefment

Et si disons:

.ii. tres nobles mestiers avons

En cest siecle, s’en parlerons

Et par raison,

Car sanz nulle comparoison

Li uns vault miex, c’est bien raison;

Si te devise.