Ms. W*3, fol. 116r–117r (ed. Micklin, pp. 241–43; with permission by the publisher, Böhlau. This is the very first part of the text; see Brall-Tuchel, pp. 30–31. I spell the long-shafted ‘s’ this way for pragmatic reasons)

DAr na dat geschreuen is Van dem heilgen lande Vnd van allen landen van ouer mer vnd van Burgen ind van steden, de da ynne gestanden inde noch steint, Nu volget her na, wat Coninge, vursten ind heren vnd patriarchen, Busschouen, ebde, Canoniche vnd paffen ind moniche vnd wilcher hande lude da hant gewont vnd noch wonnent bis vp desen dach, vnd van yrme gelouuen ind partien vnd van all yrme wesen, van krijsten, Joden vnd van heiden.

zo dem eirsten dat Conickrich van Jherusalem liget mytz in der werelde, als man he spricht, vnd dat hat van alders gewest der Joden, vnd dar na was it der krijsten, vnd nu is it der heiden, Mer in dem Conickrich wonnent alre meist krijsten.

Vort van deseme Conickrich intgain dat oisten, da sint alle de Conickrich van Jnida, da is here ouer preister Johan, vnd alle de lude, de da ynne wonnent, de sint krijsten.

Vort intgain dat suyd oyst by Jndia Sint alle Conickrich van Nubien vnd dat Conickrich van Tharsin, vnd de lude sint ouch krijsten, Jnd danne waren Melchior ind Balthasar, zwein van den heilgen drin Coningen, de vnsem heren den offer brachten zo Bethleem.

Vort intgain dat Norden oyst liget dat Conickrich van Georgien vnd dat Conickrich van Abcas, vnd de lude, de da ynne wonnent, sint vrome starcke krijsten.

Vort liget intgain dat norden dat Conickrich van Grecken vnd dat Conickrich van Armenien, vnd de lude, de da wonnent, sint ouch krijsten.

Vort alle dese lude, de in desen Conickrich wonnent, de sint alle krijsten, Mer sy en sint neit al gelich gude krijsten, Sy sint myt etzlichen artikelen ind punten gescheiden vnd gedeilt, als her na geschreuen steit.

Vort alle dese Conickrich sint ere yecklich wale so mechtich als der Soldain, Mer dat ir eyn dem anderen neit gelegen en is vur wasser vnd woistenien vnd ander hindernisse.