A transcript of the bloodletting poem's witness in TCC R.14.51 is given below.

Modus qui docet ad minuendum hominis sanguinem

For to kenne ye veynes to late blode

To ye that lates many gode men blode

And wynnes that with thi worldes fode

Take hede that you doo but gode

Somme veynes vse they sykerle

And many other late they be

Therfore nowe wole I hem schewe

And telle hem you alle on rowe

And where they lyggen euereychone

And for what sckylle they schall be done

Ilka man hathe XXXth and three

lysten and I schalle telle hem the

Byhynde thyne eeres you schalte fynde two

yf you wolte late the blode of tho

And two in thy temples shall not beleuede

ffor the stomake and the werke of the heede

In the myddes of the foreheede fyne may you haue

ffor the lepre euell hit moste be take

And vndre the noyse lieth a vayne

Therewith schall the franesye be slayne

vpon thy nose right faste by thine eyen

late the blode gif you be slyne

ffor then blerede and the scomme

And than schall you hele hem all and somme

Two in thine nekke hole schalte you fynde

ffor lepre and scabious of kende

And two veynes are in euery lyppe

ffor hem wole I not ouer skyppe

And vndre thy tonge lieth one

ffor the swynesy that schall be taken

And nowe byneth wolle I goo

So [tha]t you may kenne al. thoo

Ilka man that ys on lyne

In hys arme hathe veynes fyue

Aboue the heede byhoues hem to blede

whan the heede hathe any nede

ffor all the body in myddes the arme