Ngizwa izinsimbi zincencetha.

Lezo zinsimbi ngizizwe ngimncane,

Zikhula zingiphekezela

Phansi ezilubeni zolwandle,

Ziqubula kunyazim’ amaza,

Zingiguqukele sezicula.

Ukucula kuye kunkenkethe

Phakath’ emongweni wenhliziyo.

Lezi zinsimbi zikhala phezu

Kwamazala namalib’ akwethu.

Kwethu bekundind’ uZul’ ebuka,

Ebukana nomtat’ ucwebile,

Uyakazel’ amanz’ aluhlaza,

Uhlaz’ olwang’ imamba yemithi

Engiyibone ngaqhaqhazela,

Ngathi ngihlomile kanti ngize.

Ngibalekile ngacasha nhlanye,

Ngabon’ umhlaba usimbuka wonke.

Kwath’ esikhundleni sokushaywa,

Kushaywana namahaw’ enkomo,

Ngezwa nina zinsimbi zomLungu,

Enikhale ngaqale nganengwa,

Nganengwa kwafuquza nolaka,

Ngagcwal’ umusi ngaze ngabohla,

Ngabohla ngahlala phezu kwetshe.

Leza kim’ izwi lenu zinsimbi,

Langigumulis’ umutsh’ omkhulu,

Langinik’ indlu yemilenz’ emibili,

Langibhec’ emhlane ngamalokwe,

Ngawathatha ngisaphukazela.

Ndabazemkhonto ngikushiyile,

Gudulokubhenywa ngakulahla.

Namhla ngingumngquphane womhlaba.

Nginanto yinye phansi kwelanga;

Amehlo nezindleb’ ezimbili;

Kokubili kufunz’ inhliziyo.

Lapho ngithi nginokucabanga,

Nomqond’ ohlaziy’ okubonwayo,

Izenzo zomakhelwane wami

Zichith’ ubuntu bemvelo kimi.

Ji! Kuhle ngihlale phansi ngibuke.

Mlungu, wahlule wachith’ uZulu!

Ngiyakubon’ ukujaja kwakho.

Ngihlekwa nayizindonga zakho,

Zisukum’ emhlabathini, Zulu,

Zimi phezu kokuhlakanipha

Kwendumo yolwandle namathongo

Okuthiw’ aphethe konk’ ukwazi.

Khalani zinsimbi kusemnandi!

Ngizwa izwi lenu libubula,

Libik’ umhlab’ osuguqukile.

Lingikhumbuza ngenkaba yami,

Lingikhumbuza lapho ngiqome

Khona, ngaqom’ eThekwin’ olwandle

Ngingentombi yon’ eqom’ insizwa.

Ngikuvumile Theku ngakuqoma.

Ngikuqome njengoMameyiguda

Beshikish’ indlamu eMsizini;

Ngakuqoma njengoShampeyana

Ephehl’ umLungu njengobulawu;

Ngakuqoma njengoLuthuli

Ekhanyis’ iLanga kwabamnyama;

Ngakuqoma njengomfo kaSamvu

Egogod’ ubunyanga bomLungu.

Khalani zinsimbi zabeLungu!

Sebevukil’ oMafukuzela,

Bancinz’ umqondo womunt’ omnyana.

Niyakhala kanivusi bona

Abanishaya benibhekile.

Nivusa thin’ esicashe phansi

Kwemizizi yethunzi lomLungu.

Khalani! Kungani zinsimbi!