Woza wena Nonjinjikazi!

Woza mshikishi wendlela,

Wen’ olunyawo lumbaxambili,

Lwalukwe zisinga zensimbi

Zikhwela, zeqana, zehlana

Phansi naphezu kwamathafa;

Wen’ owathath’ obabamkhulu

Wababhungula nakalokhu;

Sathi sibabuza waziba,

Washushubeza ngejubane

Sengath’ uvalwe nezindlebe,

Utshobele unotshobela.

Waleth’ izihubahubane

Zazovukuz’ umhlaba wethu,

Kunamhla sibon’ amagquma

Amhlophe njengezihlabathi

Zemisinga yamanz’ olwandle.

Bheka nakhu ngihlezi phansi

Kwexhib’ abaphumula kulo

Okade ubaginge bezwa.

Ngibuka ngasempumalanga

Lapho kusuka izikhatha

Zentuthu nothul’ olumhlophe,

Ziqubuka zisho phezulu.

Kumnandi ukuba sendaweni

Enjengalena laph’ ilanga

Seliyoshona liyinhlamvu

Yomlil’ obomv’ ukhanya

Kwanga uvivi lokusa.

Ngiyalibona leli langa

Eliphelezelwa ngamafu

Akhanyis’ okwensimb’ ebomvu

Ivutha phakathi kwelahle –

Linendingilizi yomqhele

Ocwebezelis’ okwegoli

Lawo babamkhul’ e-Afrika.

Shona langa lemihla yonke,

Wen’ owanqab’ ukukhanyisa

Kithina sizwe sikaMnyama

Imfihlo yomtapo wegoli

Engilibona licebisa

Izizwe nezinxa zomhlaba.

Thina bakaMnyama sibuka

Sikhex’ izindeb’ ezinkulu.

Sondela sikhathi somnyama!

Nakho sengizwa namagekle

Akhalis’ okotokoloshe

Becwil’ emanzin’ oThukela.

Ngizw’ abaVenda nabaTshopi

Behay’ amahubo

Okuchwensa kwezithandani

Ziklabile njengezimazi

Ezimalunga nezimpemvu

Ezinkangala ze-Afrika.

Ngiyezwa kuduma naphansi,

Izinyawo zisikaz’ ize,

Zingikhumbuz’ oMameyiguda

Ngasezigcawini zeTheku.

Ngiyezw’ amahub’ ahlukile

Kwawezizwe zaseMfolozi.

Suka wena Nonjinjikazi!

Mus’ ukusondela masinya,

Ngisathathekile manjena.

Sengathi ngabe ngicashile

Phakathi kwamahlang’ akithi

Agcwel’ ummbila namathanga,

Ngingenakuthikamezeka

Yilezi zixuku zabantu

Ezidlula zixokozela.

Ngizibon’ ilanga liphuma,

Ngazibon’ ilanga lishona.

Kobamnyama kuse zidlula.