Pour bien satisfaire a ce que lempereur a ordonne | et mesmes pour pouvoir mieulx entendre et vacquer | a la bonne adresse et conduicte des affaires destat de sa maieste durant lempeschement de sa maladie | Et pour adviser quelque bon ordre en ses finances | en ses gens darmes | et en tous offices et estatz de sa maison | sa maieste a ordonne | et reparty les charges pour evicter confusion et non dylayer les affaires ainsi que sensuit |

Premiers | que monsieur le Marquis de zenette le conte de nassau chef de la maison | le grant chancellier Monsieur le grant maistre | le seigneur de lachaulx | et Messire Jehan Lalemand avec les advis | et informacions quilz vouldront prendre dautres personnes entendues et experimentees prendent le soing | et charge de pourjecter lordre que leur semblera se devoir tenir a dresser | et mectre en bon trayn lestat de la maison | et les offices et estatz dicelle | reduisant tous les livres de la maison. tant de la coronne de Castille que de la coronne darragon | Et de la maison de bourgongne | en ung seul livre | de sorte quilz soient tous paiez par une main Et qui ny ait dyversite de salaires Et que en ce ilz entendent a resequer et restraindre tout ce que serait superflux | et que bonnement et sans esclandre se pourra emender | comme fourriers pourtiers et autres offices de la maison.