Chaka se gemoedswêreld was in die war en sy woede so groot dat dit hom waansinnig wou maak, toe hy besef hoe Moselekatse en Manukuza hom in die steek gelaat het. Van daardie dag af het die spies die MaZulu en die vyand sonder onderskeid doodgemaak. En van daardie dag af het Chaka niemand meer permanent in bevel van sy leërs geplaas nie. Hy het een aangewys as die leërs opgetrek het, en as hulle terugkom, is hy van sy pligte onthef, en as hulle weer aangeval het, is iemand anders aangestel. Sy hart was erg omgekrap en het hom nie met rus gelaat nie, en baie mense is onskuldig om die lewe gebring, omdat daar gevrees is dat hulle daardie twee se veragtelike voorbeeld sou volg.

In daardie dae was spiese, hoewel beskikbaar, ’n skaars item, want dit is gemaak van ’n ysterklip wat ook gebruik is om meel mee te maal. So kom dit toe dat terwyl mense eendag daar naby die Zambezi besig was om klei uit te grawe, hulle ’n klip ontdek wat gerieflik vir die maak van spiese gebruik sou kon word. En hierdie ontdekking het Chaka ’n gulde geleentheid gegee om baie mense onskuldig om die lewe te bring sonder dat hulle sy voorwendsel agtergekom het.

Daar was ’n baie dapper man wat Chaka getrou en sonder bybedoelings gedien het en hy was gewild onder al Chaka se manskappe; sy naam was Nongogo. Toe Chaka merk hoe baie die manskappe van Nongogo hou, was hy afgunstig, want hy wou hê dat hulle van hom alleen moes hou; toe roep hy Nongogo. Toe Nongogo by die koningshuis aankom, laat hy sy spiese by die stad se omheining soos dit hoort; en toe hy naby die koning kom, prys hy hom:

Toe werp hy homself op die grond en kruip op sy maag soos dit die gebruik was om Chaka te groet. So kruip hy totdat hy naby Chaka opstaan.