Op die middag kom daar gesante by Dingiswayo aan en deel hom die doel van hul sending mee, en hoe die volk Mfokazana in sy vader se posisie aangestel het. Toe raas Dingiswayo omdat Mfokazana hom altyd agterna oor sake inlig, terwyl dit sý reg is om betyds daarvan te hoor, en hy sê: “Gaan en sê vir Mfokazana, ek het gehoor, maar hy het ’n fout begaan, en diegene wat hom in die koningskap aangestel het, het ’n fout begaan, want hy is nie die een wat sy vader gekies het om hom op te volg nie; die seun van Senzangakhona van wie se geboorte hy my vader laat weet het, leef nog, en hy het gesê, tuis is daar ’n seun vir hom gebore, en hy sal hom in sy amp opvolg. Ek was self daardie dag daar; en die gesante wat gestuur was, is steeds hier, ek ken hulle; Senzangakhona het nooit Mfokazana se naam genoem nie.”

Die gesante vertrek toe teleurgesteld, selfs bang, om die een wat hulle gestuur het, te gaan ontmoet. Toe Mfokazana die nuus hoor, stuur hy hulle weer terug, en stuur ook die gesante wat gestuur is om Jobe oor die geboorte van Chaka in te lig. Hy stuur hulle met die boodskap dat sy pa agterna gesien het dat Chaka ’n slegte kind was wat hom nie gehoorsaam het nie, en ook sy ma wat ’n towenares is; dit is inderdaad om daardie rede dat hy hom saam met sy ma weggejaag het.

Dingiswayo antwoord toe en sê: “Gaan en sê vir Mfokazana, ek hoor vandag vir die eerste keer dat Senzangakhona van mening verander en gesê het dat Mfokazana sy opvolger is; wie het hy daaroor ingelig? En dan hoor ek ook vir die eerste keer dat Nandi ’n towenares is; wie het sy getoor? Sê ook vir Mfokazana, selfs ook daardie dag toe Chaka die leeu doodgemaak en Senzangakhona dit aan my gestuur het, het hy weer sy boodskap van vroeër bevestig dat Chaka die erfgenaam is.” Toe Mfokazana dit hoor, roep hy die volk bymekaar en deel hulle mee dat die koningskap van hom afgeneem is deur Dingiswayo en aan Chaka gegee is, en hy sê: “Vandag sal ons sien wie my vader se ware volgelinge was, noudat sy weeskind sy regte ontneem is.”