Senkatana o tjhaketse mmae ya ntseng a kula. Mmae o dutse pela lebota hodima moseme. Senkatana o dutse hodima kutu ya sefate.

Senkatana: Le tsoha jwang kajeno he, mme?

Mmaditaolane: E ntse e le ona mokgathala wa maoba le maobeng, ngwanaka. Ona o tjena ha se o ka kgathollwang ke phomolo e ka kwano ho lebitla. Rona re se re le ba ileng. Empa keng ha o shebeha o kgathatsehile hakaalekale?

Senkatana: Ke boima ba morwalo wa borena.

Mmaditaolane: Boima kgale o bo jere, na o qala ho bo elellwa matsatsing ana? Keng ha fahleho sa hao se fetohile tjena? Se ka mpatela hle, ngwanaka, ke a o kopa!

Senkatana (Ka boswaswi): Mohlomong ke hona bo finyellang mahetleng a ka.

Mmaditaolane: Bua hantle, ngwanaka, molato keng?

Senkatana (A ntse a bososela): Mohlomong ke ho kula ha hao mme!

(O a tholathola mme ka mora motsotswana o tlohela ho swaswa, o sheba mmae mme o bua a tiile)

Mme, ke a lohotha, moya wa ka ha o tsebe phomolo. Ke hara ntwa, ke leka ho lwantshana le bobe tjhabeng sa rona, empa ba bang ba nyatsana le tokiso eo, mme ba tlatsa moya wa hore ke hlouwe setjhabeng!

Mmaditaolane: Ba jwalo ba lokela ho tshwarwa ba bolawe hore o phele, o phelele setjhaba, o tsebe ho lokisa.

Senkatana: E, ho a utlwahala. mme. Empa …

(O a ema)

Mmaditaolane: Empa eng?

Senkatana: Empa na ke hantle ho bolaya batho hobane ba sa dumellane le nna? Na ke toka? Ke re ke lwanela toka, ke batla ho fedisa bokgopo. E tla be e le bona bokgopo ho ba fedisa hobane ba sa dumellane le nna. Nka lwantsha bobe jwang le nna ke ntse ke bo etsa? Na ke lokela ho etsa bokgopo hobane kotsi e shebane le nna? Tjhe. Toka ho ya dumelang ho yona, e lokela ho emelwa le ha e tlisetsa moemedi wa yona lefu hobane ho shwa yena, toka e ho yena ha e shwe. Ka boitelo ba hae o e fa matla, mme e tla phela ke hona. Ho bolaya ba sa dumellaneng le nna ke ho bontsha hore ke a ba tshaba, hore ke tshaba bokgopo boo ba bo emelang.