Hara sebaka ho na le sefate se nang le makala. Tlasa sefate sena ha lesela le nyollwa ho bonahala Senkatana a robetse. Pela hae ke koto le kobo. Ka mora motsotsonyana o phahamisa hlooho, o a dula, o pikitla mahlo mme o sheba hole, o a bososela.

Senkatana: Tsatsi le leng le le leng le fetang, motsotso o mong le o mong o fetang, ekare o ntse o totisa botle ba tsohle.

Ke robetse ke kgathetse, ke sa bone letho. Ke tsoha ke le morolo, ke bona.

Mahlo a ka a bulehile, ke bona ho feta.

Ke tsoha ke bona botala bo se nang phello. Ke bona dithaba tse entseng leqhubu le le leng, tse nyolohelang lehodimong jwalo ka difate.

Ke maqharanqha ka hohle. Ke diqubuqubu.

Hlorong tsa tsona ka hohle ke didiba, ke metsi;

Metsi a benyang letsatsing, a phatsimang, a ntseng a benya, eka a a hoa, a mema mahlo hore a bone botle ba ona le ba dithaba.

Dithoteng ke jwang, ke dimela tse tala, botala bo kgathollang mahlo a tepeletseng. Diphuleng e sa le bona jwang, e sa le dimela. Mabopong a dinoka, dinokana le melapo metsi a ntse a hwasa jwalo ka hoja a bitsa, a bitsa ditsebe hore di mamele pina, pina eo di e binang, kodi-a-malla, pina e se nang qalo le qetello!

A botle bo hlollang! Botle bo sa feleng!

A ke nna feela ya bitswang ke tseo ke di bonang, ya bitswang ke tseo ke di utlwang?

Botle bo bokaale ha se mpho ya a le mong. Ya leng mong a ke ke a thaba ka mehla. Bo ka tlala pelo ya hae, ba e phatlola,

a ba mahlomoleng. Ke botle ba bohle!

(O tiisa sefahleho)

Empa bohle ba kae! A kae a mang mahlo a ka bohisanang le a ka botle bona?

Di kae tse ding difahleho tse ka bososelang, di bososela di bona seo ke se bonang?

A sehloho se re wetseng hodima rona bohle! A bomadimabe bo se nang ho lekanngwa!

Bomadimabe bo re arohantseng! Bongata bo ka mpeng ya sebata. Bongata bo lefifing le tshabehang, moo mahlo ho seng seo a ka se bonang, moo ho bonahalang lefifi feela;