Ho kena diboni tse pedi hape.

Seboni: Senkatana le mmae ba ile leetong la bona.

Mmae o ile meokgo e sekile mahlong

ke lerato leo a ratang mora ka lona.

O ile a tletse thapelo ka pelong ya hae. Ha e le Senkatana yena o ile a thabile, sefahleho sa hae se edile, a le kgotso. Tse ding difahleho di ela hona kotsing, hona moo lefu le leng teng, ha feela di tseba hore ba bangata ba tla lopollwa hona kotsing eo.

Moboni: O ile, o hlabane; o hlotse, o pholositse.

Ka hohle ke modumo, ke marata a nyakallo, Ka hohle medumo e rorisa lebitso,

lebitso la ya ba lopolotseng. Ka hohle maleme a a rorisa. Ka hohle ho utlwahala dithoko.

Ho rokwa Senkatana molopolli. Ke thabo, ke kgotso, ke nyakallo.

Seboni: Ho lehlohonolo ya itellang ba habo; Ya behang bophelo ba hae kotsing

hore ba tswe matshwenyehong a bona. Ya sitwang

ho dula a kgotsofetse

ha ba habo ba le tlokotsing.

Eo thabo ya hae e leng ho thusa ba habo. Ya itokiseditseng ho ba sebeletsa ka mehla.

Ya jwalo ke yena ya tsebang seo a se phelelang. Ke eo bophelo ha hae bo nang le thuso.

Ya phelelang ba bang ke yena ya tla phela. Ya iphelelang ke yena ya tla shwa.

Moboni: Ho madimabe ya phelelang ba bang;

Ya ba sebeletsang, ya ba lopollang matshwenyehong.

Ke yena ya tla jara mathata a bona;

Mathata ao a ba lopollotseng ho ona.

Ke yena eo ba tla mo hloyela setumo sa hae: Hona hobane a ba lopolotse —

Ke yona teboho eo ba tla mo nehang yona.