Banna ba bangata ba bokane, ba dutse kantle, mme ba nwa jwala. Ka pele ho bona ke nkgo e kgolwanyane, mme thokwana le bona ka letsohong le letona ho dutse leqheku le leng. Ka pele ho lona ke nkgwana e nyenyane, mme le yena o tshwere mopotjwana matsohong a hae. Basadi ba bang ba dutse ka thoko, tsohong le letshehadi, le bona ba na le nkgwana ya bona.

Redi: Ba tla ba eba monate jwala, kapa monate wa bona o se o hodiswa le ke thabo ya tokoloho eo re e fumaneng?

Malefetsane: Tjhe, ha re tsebe moo. Tsamaya o yo botsa ho ba sa thabang, ba sa leboheng tokoloho, hore na ekaba bo ntse bo re tswe jwalo ka ho rona.

Redi: Hela, Malefetsane, na taba ena eo o e phetang ya hore ho na le ba bang ba sa nyakallang na ke nnete? Ke utlwile motho e mong a bua ka taba e jwalo …

Malefetsane: Yaba o a mo tlohela, wa se ke wa mmotsa hore na o buiswa keng jwalo hobane o tseba hore o na le sephoqo sa hao se bitswang Malefetsane, se leleme?

Redi: Tjhe bo, weso. Ke ile ka re ekaba o a swaswa mme ka se ke ka nahana haholo ka taba eo …

Malefetsane: Jwale nna o se o bone kang hore ha ke swaswe he?

Redi: Tjhe, ha ke kgolwe hore o a swaswa. Le ka swaswa ka mantswe a tshwanang jwang jwalo ka ha eka le dumellane ka ho swaswa ka ona. Le tlamehile le be le bone ntho e le nngwe e etsang hore le bue jwalo ..

Malefetsane: Ehe! Re tla utlwa ka wena! E tle e re ha eba re dumellane ho tsamaya re swaswa jwalo.

Redi: Ekaka yaba le itshwere hampe hore le bapale ka mathe metsi a le teng.

Malefetsane: Mohlomong re itshwere hampe he …

(O bona Mmasetjhakatane a se a ba shebile haholo mme a itokisetsa ho bua.)

Wena jwale o se o re tonetse mahlo hakaale, molato keng? Ka mokgwa oo basadi le fefethang kateng, o se o rata ho di jala. Tswela pele he!

Redi: Wena Mmasetjhakatane, o ne o rata ho reng?