Ho dutse banna ba babedi. Ka pele ho e mong ke nkgwana ya jwala. E mong o tshwere mopotjwana. Ha lesela le phahama, o hlaha a qetella ho nwa se ka hara mopotjwana mme o o beha fatshe, o a itatswa, a ntano hlakola molomo ka letsoho la hae. Pela bona ho na le e mong ya rapalletseng eo ho bonahalang hore o kgalehile.

Masilo: Jwala bona bo monate ka nnete, kapa ke hobane e le kgale haholo ke qetetse ho nwa seno sena sa rona. Tshela hape, wena Monyohe, re ke re ikutlwise. Maswabi yena ha ke tsebe na o robetse bofe. Na motho o rata boroko eo, banna!

Monyohe: Tlohela Maswabi a ithwaballe, monna. Wena ha e le moo o se o sa batle ho tloha pela nkgo ee, ke mang ya o hlodiyang ka hore o rata jwala haholo?

Masilo: Wee! Ana motho o rata ho omana enwa le yena!

Tshela le tlale, re nwe. Ke mokete, hape ho bile ho a lokela hore re nwe kajeno. Senkatana ke morena.

Ha e ne e se ka yena o ka be o ntse o bobola hakaale moo? See sa heno se ka be se tjapalletse tjee fatshe, se kgona, ntsi e kena e bile e etswa ka molomong?

O a swaswa. Ho ka be ho se ngwana e motle kajeno.

Mohlomong wena o ka be o fapane hlooho, o le le lokelang ho ja jwang le dikgomo naheng kwana; motho wa lona a bile a rata le ho thola a nahana bohatanyana tjee, ka nnete o ka be o hlanya wena. Tshela bo!!

Monyohe: Teng o a bolela, weso. Mohlomong nka be ke hlanya kajeno. Wena o re ha e le moo wena o se o bonahala o hlanya tjee kapa o ntse o re o a bapala wena? E se e le ha o hlanya ruri. Ba qala tjee ka wena. Feela e re ke o tshelle o etse o mphete. Ke ntse ke bona o tloha o nkgama hona jwale. Etswe ke tokelo ya hao e tswang ho Senkatana. Hoja e se be ka yena, o ka be o bo mona kae kajeno?