Ka tlung. Motsheo ho ntlo, pela lebota le shebaneng le batho, ho na le nkgonyana ya metsi mme mohope o bonahala ka hodimo. Pela nkgo ke dijana tse seng kae tsa letsopa. Hara ntlo, empa haufi le nkgo, ho bonahala leifo mme pela lona ke kutu ya setulo seo Senkatana a dutseng hodima sona, nkgo e le ka letsohong le letshehadi. Malebana le yena, empa ka nnqane ho leifo, ho adilwe moseme fatshe. Ho kena Mmaditaolane mmae, mme o dula mosemeng. Senkatana jwale o apere kobo.

Mmaditaolane: Dumela hle, ngwanaka, o kene neng ka tlung? Ke kgale ke o lebelletse. Ke ne ke se ke bile ke maketse hore na o lebile kae kajeno. Ha o mpona ke kena tjena ke se ketswa hlwela ka mafikeng ka mona hore esebe o hlahetswe ke kotsi.

Senkatana: Kotsi ke ha e le ya eng mme? O mpa o ipolaisa letswalo feelafeela tjena. Nka jewa keng?

Mmaditaolane: O buiswa ke ho se tsebe, ngwanaka. Lefatsheng lena le tletseng dikotsi ka hohle, moo re itsamaelang hodima mabitla ka dinako tsohle, moo re teetsweng hare ke nyakallo le maswabi ka mehla, o ka boela wa botsa hore na o ka jewa keng? Ke ho se tsebe, ngwanaka.

Senkatana: Na ke hoo o ka bang wa ya nyarela mafikeng o mpatla?

Mmaditaolane: Ya nang le ntho ya bohlokwa, ntho e leng pelong ya hae, ya jwalo, ha a tsebe kgotso ha e se feela ha seo a se ratang se le pontsheng ya hae. Ha se le siyo pelo e balabala ho fihlela se fihla hape.

Senkatana: Matlakala a kang nna tjee le ona?

Mmaditaolane: Ngwanaka, moratuwa wa ka, seo o leng sona, pelong ya ka,

o ke ke wa se tseba le ka mohla, ha o sa tsebe tseo ke di boneng. Mahlomola ao ke phetseng ho ona! Ke ne ke setse ke le mong hara dithaba le maralla, hara dinoka, hara diphula le dithota. Ke ne ke setse ke shebane le botle ba tsona bo hlollang, kgotso ya tsona e tshosang le nyakallo ya tsona ya ka mehla. Boinotshing ba ka tsohle tsena di ne di ntshosa. Ke ne ke tshwana le kokwana pela matla a tsona, matla a ya di entseng.