Lesela le a phahama mme ditokiso e sa le tsa lebala la bobedi. .Mmaditaolane o dutse fatshe mosemeng. Ha lesela le phahama o bonahala a shebile ka pele ho yena. Ka mora motsotswana o hlakola ka letsoho dikgapha tse mahlong. Mme ka mora moo o opa diatla jwalo ka motho ya maketseng mme o phutha matsoho sefubeng. Ka mora motsotsonyana o leka ho ema, empa o kgumama feela, matsoho a sa le fatshe, mme o a nahana. O boela o a dula mme o opa diatla jwalo ka pele. O a duladula, ho bonahala hore ke motho ya nahanang haholo taba e nngwe. O a ema mme o tsamatsamaya a leba monyako, empa a eso fihle, o a reteleha, jwalo ka hoja a lebetse ho hong. O a kgutla empa ho eso bonahale hantlentle moo a yang teng, o a ema, o opa matsoho hape mme o itshwara thekeng. O bua a hlomohile.

Mmaditaolane: Thabo e sa feleng ha se ya lena lefatshe. Tlokotsing eo ke neng ke le ho yona ke ne ke behile tshepo ya ka ho lesea lena, thabo ya ka e ne e le ho lona. Ho thusang ho beha tshepo nthong tsa lefatshe, tse fetohang jwalo ka lona? Thabo ya ka le yona e fetoha maswabi hape. Monate o fetile, bohloko bo fihlile. Mohlomong monate o tla tla hape, o latele bohloko jwalo ka pele. Na ekaba motho a ka hlola a phema bohloko fatsheng lena mme a phela nyakallong matsatsi ohle? Na bohloko bo tshwanetse ho latela monate ka mehla?

Ha ho nang. Ha ho kamoo nka mo thibang kateng.

O ikemiseditse ho phetha morero o pelong ya hae.

Hoja ha se morero wa nnete o tlotlisehang, nka be ke bua le yena. Empa ha motho a itokiseditse ho etsa se lokileng ha ho kamoo a ka thijwang kateng.

A ke ke a kgotsofala a eso phethe morero oo. Thuso keng ho phela le yena a sa kgotsofala? Le ha nna ke kgotsofetse, ke thaba ha ke mmona pela ka, ke tla sulafallwa ha ke bona maswabi mahlong a hae. A ka mpa a phetha morero wa hae, a itela mme a shwa a leka ho pholosa bohle le ho ipholosa.