Ke kgotla. Ho dutswe ke banna, ho entswe sakana- la-nkope le sa tlalang hantle, le bulehileng ka pele ho babohi. Hare ho lona, ya shebaneng le babohi, ke Senkatana hodima setulo. Hoba lsela le phahame, ho kena Bulane le ba haho. Ba a dumedisa ba nto dula.

Senkatana: Ekaba tse ntjha ke dife kajeno moo?

Monyohe: Ha di hlokahale mmusong ona wa hao, ntate.

Senkatana: Ekaba mohlomong tsa kajeno ke tse utlwahalang hantle.

Monyohe: Ke tsona tsa ka mehla: boloi, boshodu, jwalo jwalo.

Senkatana: Tjhe, ba bitse re utlwe hore na ba reng. (Monyohe o hlaha monyako, o bitsa batho mme ho kena batho ba ka bang bahlano. Ba dumedisa morena)

Senkatana (Ho wa pele): Tsa hao ke dife, wena ntate.

Mohlouwa: Morena, ke tlilo lla mona ka mantswe ao ke a buetsweng ke Mahleke. Mantswe a hae a se a mpelaeditse ka nnete. Ke bona hore nka nna ka hlahelwa ke tsietsi. Mahleke o ne a tlilo lla ho nna a re dikgomo tsa ka di mo senyeditse tshimong ya hae. Ha re se re batlisisa re fumana hore ha se tsa ka. Empa a se ke a kgotsofala, a qetella ka hore mabele ao a tla itefa ka motho. Taba eo ha e mphe kgotso le hanyenyane.

Senkatana: O se a kile a etsang e sa le a bua jwalo?

Mohlouwa: Tjhe, ha a eso etse letho ntate, empa ke batla hore a thijwe a eso tswele pele ka morero wa hae.

Senkatana: O bona eka o tla o fenetha?

Mohlouwa: E seng ho fenetha haholo kwana, empa ke bona eka a ka nna a mpetsa ka ditlhare. Se molomo o se buang ke se seng se rerilwe se qetilwe ka pelong.

Senkatana: Empa ha se ka pelong se ka fetolwa, na le teng o sa tla tshaba?

Mohlouwa: Se fetolwa jwang?

Senkatana: Ka ho etsa hore monga pelo a lahle menahano e mebe, a sale ka e hlwekileng.

Mohlouwa: Tjhe, moo ha ke tsebe.

Senkatana: Re tla bua le yena a lahle menahano eo.

Mohlouwa: Oho, le mpe le phakise hobane mohlomong tieho ya lona e ka ntlhahisetsa tsietsi.

Masilo: Ya boi enwa motho!

(Banna baa tsheha)

Monyohe: E nngwe ke ena nyewe. Ema, Raseretsana.

(Raseretsana o a ema)