Folios 9r–11r contain copies of royal charters; they have titles in red ink at the top of each page, on each verso “Carte” and on each recto “Regie”.

Carta libertatum artis aurifabrorum [13 March 1327]

Edward par la grace de Dieu roi d’Engleterre, Seignour d’Irland & Ducs d’Aquitaigne, as touz ceux as queux cestes presentes lettres vendrount, Salutz. Moustrez nous ount noz biens amez les orfeveres de nostre citee de Loundres par lour petitioun mys devaunt nous & nostre conseil en nostre parlement tenuz a Westmoustier apres la feste de la Purificacioun Nostre Dame proschein passé, qe come avant ces heures nul marchaunt privé ne estrange ne soleit amesner en ceste terre nulle moneye forgé mes que plate de argent pur faire eschaunge a nostre Coigne. Et auxint feust ordeigné qe touz ceux qi feurent del mestier des orfevres soleient seer en lour shopes en la haute rue de Chepe, et qe nul argent en plate ne vessel d’or ne d’argent ne deveroit estre venduz en la cité de Loundres si noun a nostre eschaunge ou en Chepe en l’orfaverie, & ceo overtement qe les gentz del dit mestier poaient avoir avisement del vendour s’il feust loialment avenuz a tiel vessel ou ne mye. Ore novelement les marchantz suisditz, auxibien privés come estraunges, amesnent de estraunges terres en ceste terre esterling contrefait, dount la livre ne vaut forsqe sesze souldz del droyt esterling, et de cele moneie ne poet homme avoir conisaunce s’il ne soit par feu. Et auxint plusours qe se fount del dit mestier des orfevres teignent lour shopes en venelles oscures et rues foreines, et achatent vessels d’or et d’argent en musset & ne mye en querant si le vessel soit emblé ou de loial purchas, et meintenant le mettent al fieu & fount translater en plate et le vendent as marchauntz passajours pur le porter hors de ceste terre, et ensement fount fauces overaignes d’or & d’argent come de coronaux, fermeux, aneux & autres jueaux es queux ils mettent veirres de diverses colours contrefaitz a perrie, et mettent pluis d’alai en l’argent qe faire ne deussent, les queux ils vendent as mercers & as autres qi de ceo ne ount conissaunce.